Árekstrarprófun Euro NCAP: Skoda Yeti fær fullt hús stiga

Skoda Yeti fékk nýlega hæstu einkunn með tilliti til öryggis í árekstrarprófun Euro NCAP. Yeti er ný gerð smájeppa frá Skoda og er þetta í fyrsta sinn sem öryggi hans er tekið út af Euro NCAP.

Euro NCAP prófuninni hefur verið breytt og gerir hún núna meiri kröfur til öryggisþátta í hönnun bíla en áður. Yeti fékk hæstu einkunn í prófuninni, eða fimm stjörnur. Öryggi fullorðinna farþega reyndist gott sem og aðrir þættir í prófuninni.

Óaðfinnanleg útkoma Yeti í öryggisprófuninni er um margt athyglisverð. Meðal þess sem fólst í prófuninni var svokallað „hálshnykkspróf”, sem er nýr liður sem kynntur var til sögunnar í Euro NCAP á þessu ári. Tilgangur prófunarinnar er að meta stöðugleika sætanna og öryggi farþega gagnvart skaða á mænu við högg á aftanverðan bílinn. Útkoma Yeti í þessum hluta prófunarinnar er ein sú besta frá upphafi. Í matskýrslu Euro NCAP segir að Skoda hafi sýnt fram á að farþegar, ungir sem aldnir, njóti sambærilegs öryggis hvar sem þeir sitja í bílnum.

„Niðurstöðurnar endurspegla þá áherslu sem við höfum lagt á öryggisþátt bílsins allt frá upphafsferli í þróun hans, t.a.m. með prófunum á mismunandi sætauppröðun og efnisnotkun. Við gerum prófanir á mismunandi sætauppröðun og leggjum okkur fram um að bæta eiginleika sætakerfisins. Svo unnt sé að tryggja farþegum hámarksvernd verða allir hlutar kerfisins að starfa hnökralaust. Við styðjumst við nýjustu tækni og prófunaraðferðir vegna þess að öryggi er lykilþátturinn í þróun nýrra gerða Skoda,” segir Dr. Eckhard Scholz, stjórnarmaður hjá Skoda Auto sem er ábyrgur fyrir tækniþróun. Í matskýrslunni fagnar Euro NCAP sérstaklega auknu öryggisstigi bílsins sem rekja má til hnjápúða, sem er meðal staðalbúnaðar í Þýskalandi. Yeti fæst jafnframt útbúinn með allt að níu öryggisloftpúðum.

Í þeim lið prófunarinnar sem laut að öryggi í farþegarými var útkoma smájepplingins Yeti  hvorki meira né minna en 92% sem rekja má til stífleika yfirbyggingarinnar sem er gerð úr hástyrktarstáli. Það, ásamt hámarksvernd frá öryggisloftpúðum, skilaði bílnum toppeinkunn í hliðarárekstrarprófuninni.

Verkfræðingar hjá Skoda lögðu ríka áherslu á virkt öryggi við hönnun Skoda Yeti. Eins og kveðið er á um í stöðlum Euro NCAP kviknar aðvörunarljós þegar öryggisloftpúði í farþegasæti er aftengdur. Þegar vél bílsins er ræst birtist “Airbag On“ á skjá sem gerir ökumanni aðvart um að öryggisloftpúðinn er tengdur. Staðalbúnaður í Skoda Yeti er ISOFIX sætafestingar fyrir barnabílstóla í aftursætum.
 
Auk þess að fá frábæra einkunn fyrir öryggi í farþegarými, (sérstaklega öryggi barna), kom Yeti sérlega vel út úr prófun þar sem lagt var mat á meiðslahættu gangandi vegfarenda, verði þeir fyrir bílnum. Í þeim lið prófunarinnar hlaut Yeti fullt hús stiga fyrir hönnun á stuðurum. Niðurstöðurnar, sem frá er greint hér að ofan, sýna fram á að Yeti er einn öruggasti bíllinn á markaðinum.

Sjá hér eldri frétt um Skoda Yeti.